「搣時﹐鍾意咪揀多次o羅」 ------ 《談單身男女2》

《單身男女2》

呢套野玩到最後﹐又係玩「搶婚」。
類似情節﹐《高海拔之戀》講明後設係假﹐元祖《畢業生》﹐男女目光呆滯﹐一句對白都冇﹐講的則是無意義和不安。
《單身男女2》結局﹐古仔爬上紫禁之癲﹐搶到高圓圓﹐講的則是虛無。

成套戲的戲劇推動力﹐是錯摸、怨恨、妒嫉。搶唔到條女﹐夜夜夢迴重開心﹐反而證明到是「真愛」。
最「感動」的一場戲﹐是古仔回去圓圓舊居﹐睹物思人﹐先訓得最好。
呢個可能係此片最清醒的要點：
唔理溝緊既係咩女﹐係溝到既一刻(即係確認左個女人的「愛」)﹐其實男人就即刻覺得虛無﹐想閃。
兩次求婚﹐都係爬山/爬大廈﹐楊千嬅同高圓圓懶開心﹐即刻有大波妹行過﹐古仔就流鼻血﹐即是用肉體本能(鼻血)﹐來掩蓋男主角對愛情的懷疑。(鼻血可見，愛則存疑）

最後古仔同圓圓搭lift﹐個構圖同《畢業生》結局一樣﹐照拍即可，編導夠膽唔要大波妹入lift﹐hold住鏡頭三十秒﹐零對白﹐睇佢兩條友畀咩反應﹐那種難堪的相對﹐我敢說呢套野層次即刻昇一級。
真係咁拍﹐(女)觀眾可能會比港女(楊千嬅)反應更大﹐即刻反檯。
反而圓圓笑住替古仔抺鼻血﹐先係最迎合到女人心理﹐也是最犬儒的一筆。