看了黃真真新片《消失的愛人》﹐表面言﹐伊一貫女性自強的中心﹐係軟化了﹐連女主角都由癲癲喪喪(薛凱琪之類)﹐變了賢妻娘母型的王珞丹。 如視此為絕症片《被消失那五年》的variations (黎明跟亡妻鬼魂同一屋簷下)﹐則女主角像粵語殘片的白燕﹐連白百河的大情大性﹐想擺脫男人控制的意識﹐都減退了。
深入看當然未必啦。
幸福家庭大致相似
愚見以為全片第一個twist﹐是林俊傑(黎明表弟)跟鬼魂女主角講：「妳唔出街﹐留係間屋度就冇事架啦」(大意)。編導其實提示了電影最重要的motif： 屋企。
全片主要場景三個﹐一、黎明屋企；二、林俊傑屋企；三、石修屋企﹐全片120分鐘﹐戲中人就在這三個室內空間來來去去﹐而連繫佢地的﹐則是血緣。家庭作為隱喻﹐可有多種解釋﹐於黃真真作品的context﹐即是父權制度﹐用家庭關係、人倫關係﹐控制女人做生仔機器﹐做牛做馬的牽絆。
黎明和王珞丹都是平面人物﹐無背景﹐職業不詳。全片接近無外景﹐他們只在室內活動﹐離開屋企﹐就係去夜店四圍蒲﹐玩一個叫「Hello, Stranger﹗」的角色扮演﹐reboot初戀的遊戲。用隱喻解﹐四圍勾三搭四﹐裡面當然隱含性冒險、性濫交的意味。
於是明白黃真真一貫喜愛夜蒲、生埋性病(如《閨蜜》的fiona sit)的女主角﹐其實唔止縱情酒色﹐反而非常「道德」﹐係講女人用性愛自主、經濟獨立﹐來挑戰男尊女卑的夫妻關係。
再對照林俊傑的規勸(「留係屋企就冇事」)﹐沿此路想觀眾就明﹐黎明夫婦於喜馬拉雅山之巔發生悲劇﹐其實一如希臘神話﹐欲與天比高﹐而被宿命痛擊的結果。二人唔肯遵守父權﹐不安於室﹐唔肯留係屋企睇TVB的後果。
跟《被消失那五年》一貫﹐全片由始至終﹐常用「上帝」的pov(由上向下俯視)﹐那是「父權」的換喻﹐亦清楚不過了。
黎明不過是腦補
《消失的愛人》另一個twist﹐愚見以為是片末女主角的畫外音﹐「之前的經歷﹐好似從冇發生﹐只得我一個人知道」(大意)。
觀眾想清楚此語﹐驚人到極﹐即編導暗示﹐電影之前100分鐘發生的事﹐包括石修父慈子孝﹐黎明有情有義﹐全部來自女主角自己編造﹐一切純潔美好﹐純為合理化自己做賢妻良母的宿命而編造。
用腐女界的術語﹐即是「腦補」﹐女主角替自己編造一個情深義重的老公﹐溫和可愛的兒子﹐鐵漢柔情的老爺﹐等自己可以含辛茹苦﹐名正言順﹐做個足不出戶﹐買餸煮飯的黃面婆。留意片末王璐丹眼角黑到出汁的魚美紋﹗美人遲暮﹐荒廢一生。
這其實是黃真真向觀眾揮出力發千鈞的一記左鈎拳﹐散場時我不禁有點頭昏。
抑或是對女觀眾的金石銘言﹐吹散虛假的愛情迷霧﹐等姊妹甦醒？
成大事不與愚眾謀
跟黃真真前作比﹐《消失的愛人》顯然稜角少了﹐爆點沒有什麼﹐女人觀點疑似減弱﹐作者本色埋得更深。愚見以為﹐反而見到黃氏的成熟﹐伊的作品會更得到普遍大眾共鳴﹐呢套不過係試金石。
此片其實見到小本荷里活片的氣勢﹐穩定﹐平和﹐不無沙沙石石﹐但平淡中twist得好靚﹐twist完又twist﹐濕手巾扭極未完﹐未到最後一切未可定論。 黎明去石修屋企那場都幾勁﹐鐵石心腸的我﹐老實說都有少少感動。
依然喜愛黃真真。
No comments:
Post a Comment