「畀o的掌聲自己啦﹐你班廢柴﹗」 ------ 從《古書堂》第七集談起

安田成美@古書堂第七集

《古書堂》之前探討了「偷書賊」、「讀書可以溝女的myth」等﹐今集則涉及另一個很重要的問題： 邪惡書店主人。

安田成美是古書堂上代店長﹐無意中遇上偷竊藤子不二雄舊作的賊仔﹐以此脅逼﹐跟住重將他珍貴的藏書奪去。

書店主人通常冇安田成美咁靚﹐但更邪惡﹐有各種不為人知的心理變態。有時源自謀生無術﹐已被淘汱(唯有踎係間書店﹐用「理想主義」來打飛機)﹐有時亦來自知識上的傲慢(intellectual arrogance)﹐有「大隱隱於市」的自我陶醉﹐唯嘆知音稀﹐然後以此驕人(咁做反而有市場)。

咩叫「知識上的傲慢」﹐上o下而家o的左膠書局﹐聽下店主店員﹐甚至三兩顧客旁若無人一邊高談闊論﹐一邊大講(好生硬的)粗口﹐就知係咩羅。

而在香港這樣的反智社會﹐書店主人一類﹐下焉者扮可憐﹐感歎港人不學無術(如樂文書店)﹐中焉者扮另類(富德樓天台有機耕種什麼的)﹐做寄生獸(主力賣咖啡飲食﹐或依附地產商、極權建制)﹐上焉者則是用自己的失敗(扮冇生意)﹐來取得道德上的優越性﹐原理跟左膠的失敗主義相似﹐「畀的掌聲自己﹗」

其中表表者﹐可能是馬國明﹐他時時以禮崩樂壞﹐書店無人幫襯﹐來取得其傳奇性的地位(通常只得丘世文一個來買書云云)。

香港最難頂的書店主人至少有兩個﹐一個是馬國明﹐另一個則是葉桂好。不像馬國明﹐葉桂好不成其為傳奇﹐即使佢想重築禮樂﹐會戴絲質手套來執書﹐無啦啦高唱京腔﹐伊終究只是個失敗者﹐因為她疑似情緒失控﹐缺乏「知識」﹐作凶人的後盾。

另一個要研究的﹐則是已故的羅志華。奇在他一直無人理睬﹐到羅君死時﹐卻一躍而成香港傳奇﹐顯然跟他的死亡方式有關： 年廿八於工廈書倉被書壓死。

一直無人搵佢拜年﹐過了兩個星期﹐尸首才被看更發現。呢個真正係蒼涼的姿勢﹐不過佢擺到尸體發臭﹐幾乎有尸蟲溢出﹐都無人理o者。到上了新聞紙﹐哀悼抽水之聲則排山倒海而至﹐亦可能見到香港知識人的病態：
消費羅志華是廢柴﹐讀得書少、不通世務、源自desperate的偏執﹐變成niche一樣的神壇﹐來製造虛假的神話 ------ 知識分子如梁文道﹐用知識來向極權獻媚﹐哄騙愚民； 廢柴如羅志華﹐則死後亦不得安寧﹐要被逼上殉道的十字架。將已死的廢物廢物利用﹐合理化一切犬儒﹐然後處於安然的位置﹐「畀的掌聲自己啦﹐你班廢柴﹗」﹐繼續淫樂和擺pose。

其實做唔掂﹐讀得書少﹐冇屋企冇朋友﹐手機停左﹐wifi都cut埋﹐咪唔好做o羅﹐香港地係咁架啦﹐跳樓又好﹐割喉也罷﹐咪死左佢算羅。何苦搞咁多野﹐畀班知識人集體姦尸﹐又唔見得佢地會組團去和合石搵你﹐就算係﹐你又搭到嗲咩？你又同佢地狗上瓦坑咩？

那次追悼會﹐小弟有幸參加﹐與會人數眾多﹐而我亦曾因冷場不少﹐主持多番要求﹐點埋名(小思之流)﹐都無人肯出台發言感到難過。反而游靜講幾句羅志華壞話﹐話好痛恨佢咩咩咩(大意)﹐我重記得。她說的這些﹐至少似人話。